ఏప్రిల్ 5న విడుద‌ల కావాల్సిన 'మ‌హ‌ర్షి'... ఏప్రిల్ 25న వ‌స్తోంది. అంటే.. దాదాపు మూడు వారాల ఆల‌స్యం అన్న‌మాట. ఎప్పుడైతే విడుద‌ల తేదీ మారిందో, అప్పుడే మహేష్ బాబు ఫ్యాన్స్ డీలా ప‌డిపోయారు. ఈ సినిమాకి సంబంధించి రీషూట్లు ఎక్కువ‌గా జ‌రుగుతున్నాయ‌ని, అందుకే షూటింగ్ ఆల‌స్యం అవుతోంద‌ని, ఈ కార‌ణం వ‌ల్లే... విడుద‌ల తేదీ కూడా వాయిదా ప‌డింద‌ని ప్ర‌చారం జ‌రుగుతోంది.
దీనిపై నిర్మాత‌ల్లో ఒక‌రైన దిల్‌రాజు స్పందించారు. "అమెరికా లో కీల‌క భాగం తెర‌కెక్కించాల్సివ‌చ్చింది. అక్క‌డ.. వీసాలు దొర‌క‌డం క‌ష్ట‌మైంది. అనుకున్న స‌మ‌యానికి షెడ్యూల్ పూర్తి కాలేదు. కాబ‌ట్టే.. సినిమా ఆల‌స్య‌మైంది. అంత‌కు మించిన కార‌ణం ఏమీ లేదు" అని తేల్చేశాడు దిల్ రాజు.
హైద‌రాబాద్‌లో చివ‌రి షెడ్యూల్ ఉంటుంద‌ని, అది మార్చి నాటికి పూర్త‌వుతుంద‌ని ఏప్రిల్ 25న 'మ‌హ‌ర్షి' విడుద‌ల అవ్వ‌డం ఖాయ‌మ‌ని గ్యారెంటీ ఇచ్చారు దిల్‌రాజు. వంశీపైడిప‌ల్లి ద‌ర్శక‌త్వం వ‌హిస్తున్న ఈ చిత్రంలో పూజా హెగ్డే క‌థానాయిక‌గా న‌టిస్తోంది. అల్ల‌రి న‌రేష్ కీల‌క పాత్ర‌ధారి.
