మెగా మేనల్లుడు 2 వైష్ణవ్‌ తేజ్‌ సినిమాలో ఐటెం సాంగ్‌ కోసం కృతిసనన్‌ని తీసుకురానున్నారట. మహేష్‌బాబుతో '1 - నేనొక్కడినే' సినిమాలో హీరోయిన్‌గా నటించిన కృతిసనన్‌ తర్వాత 'దోచేయ్‌'లో కనిపించింది. ఆ తర్వాత బాలీవుడ్‌కి చెక్కేసింది. ఇప్పుడు వైష్ణవ్‌తేజ్‌ కోసం మళ్లీ టాలీవుడ్‌కి రానుందనీ విశ్వసనీయ వర్గాల సమాచారమ్‌.
సుకుమార్‌ నిర్మాణ భాగస్వామ్యంలో రూపొందుతోన్న ఈ సినిమాని ఇటీవలే లాంఛనంగా ప్రారంభించిన సంగతి తెలిసిందే. సుకుమార్‌ సినిమాల్లో స్పెషల్‌ సాంగ్స్‌కి ప్రత్యేకత ఉంటుంది. 'రంగస్థలం' కోసం పూజాహెగ్దేని తీసుకొచ్చిన సుకుమార్‌ ఈ సినిమాలో స్పెషల్‌ సాంగ్‌ కోసం కృతిసనన్‌తో సంప్రదింపులు చేస్తున్నారట. సుకుమార్‌ దగ్గర అసిస్టెంట్‌గా పని చేసిన బుచ్చిబాబు ఈ సినిమాకి దర్శకుడు.
ఫస్ట్‌లుక్‌ ఫోటోతోనే ఈ సినిమాపై భారీ అంచనాలు క్రియేట్‌ చేసేసింది చిత్ర యూనిట్‌. వైష్ణవ్‌తేజ్‌ ఫిషర్‌ మ్యాన్‌ కుటుంబానికి చెందిన పల్లెటూరి యువకుడి పాత్రలో కనిపించనున్నాడీ సినిమాలో. 'రంగస్థలం' సినిమా కథకు కాస్త దగ్గరగా ఈ సినిమా కథ ఉండబోతోందనీ గుసగుసలు వినిపిస్తున్నాయి. దేవిశ్రీ ప్రసాద్‌ ఈ సినిమాకి మ్యూజిక్‌ అందిస్తున్నాడు.. రెగ్యులర్‌ షూటింగ్‌ త్వరలో ప్రారంభం కానుంది. హీరోయిన్‌ వివరాలు ఇంకా వెల్లడి కావల్సి ఉంది.
