బ‌యోపిక్‌ల మీద మోజు పెరుగుతోంది త‌ప్ప, త‌గ్గ‌డం లేదు. `మ‌హాన‌టి` మిన‌హా ఏ బ‌యోపిక్‌కీ ప్రేక్ష‌కుల ఆద‌ర‌ణ ల‌భించ‌డం లేదు. అయినా స‌రే - బ‌యోపిక్‌ల సంఖ్య పెరుగుతూనే ఉంది. తాజాగా `చిరంజీవి` బ‌యోపిక్ కూడా మొద‌ల‌వ్వ‌బోతోంద‌న్న ఓ టాక్ వినిపిస్తోంది. దాదాపు మూడు ద‌శాబ్దాలుగా నెంబ‌ర్ వ‌న్ సింహాస‌నం పై కూర్చున్న ఘ‌న‌త చిరంజీవిది.
ఒక్క‌డే వ‌చ్చి, ఒక్క‌డుగా ఎదిగి, ఒక‌టో నెంబ‌ర్ స్థానాన్ని ఏల‌డం మాట‌లు కాదు. అందుకే చిరు ప్ర‌స్థానం వెండి తెర‌పై చూపించాల‌నుకుంటున్నారు. అయితే చిరంజీవి బ‌యోపిక్ అనే ఆలోచ‌న మెగా ఫ్యామిలీది కాదు. మెగా ఫ్యాన్స్‌ది. చిరంజీవి బ‌యోపిక్ తీస్తే బాగుంటుంద‌ని చిరు అభిమానులు అభిప్రాయ‌ప‌డుతున్నారట. ఈమ‌ధ్య కొంత‌మంది ఫ్యాన్స్ చ‌ర‌ణ్‌ని క‌ల‌సి ఈ విష‌యం చెప్పిన‌ట్టు స‌మాచారం.
అయితే చ‌ర‌ణ్ మాత్రం ఏమంత ఉత్సాహం చూపించ‌లేద‌ని తెలుస్తోంది. నాగ‌బాబు కూడా `అన్న‌య్య ప్ర‌స్థానం అందిర‌కీ తెలిసిందే. అందులో కొత్త విష‌యాలు గానీ, మ‌లుపులు గానీ ఏం ఉండ‌వు` అంటూ తేల్చి పారేశాడు. ఒక‌వేళ 'ఎన్టీఆర్‌' బ‌యోపిక్ హిట్ట‌యితే.. అప్పుడు చిరు బ‌యోపిక్ గురించి ఆలోచ‌న‌లు మొల‌కెత్తేవేమో. ప్ర‌స్తుతానికైతే ఇది కేవ‌లం ఫ్యాన్స్ డిమాండ్‌గానే మిగిలిపోనుంది.
