'ఎక్కడికి పోతావు చిన్నవాడా' సినిమాలో దెయ్యంగా నటించి ముద్దుగుమ్మ నందితాశ్వేత సూపర్‌ హిట్‌తో పాటు, నటిగా మంచి మార్కులు కొట్టేసింది. ఆ తర్వాత నటించిన చిత్రాలేవీ ఆమెకు ఆ స్థాయిలో గుర్తింపు తెచ్చిపెట్టలేదు. కానీ సెంటిమెంట్‌ బాగా వర్కవుటవుతుందని కాబోలు ఈ దెయ్యం పాపను మరోసారి దెయ్యంలా మార్చేశారు 'ప్రేమకథాచిత్రమ్‌ 2' సినిమాతో. ఈ సినిమాలోనూ నందితాకి దెయ్యం పాత్రే దక్కింది.
ఇదిలా ఉంటే, ఈ బ్యూటీ ప్రధాన పాత్రలో ఇంకో సినిమా కూడా తెరకెక్కుతోందండోయ్‌. అందులో మాత్రం నందితా దెయ్యం కాదులెండి. అమ్మడిలో మంచి యాక్టింగ్‌ టాలెంట్‌ ఉంది. అయితే అన్నిసార్లూ దానికి కాలం కలిసి రాదు కదా. అలా గతంలో ఫెయిలై ఉండొచ్చు. కానీ తాజాగా నందితాశ్వేత 'అక్షర' అనే మెసేజ్‌ ఓరియెంటెడ్‌ సినిమాలో నటిస్తోంది. అబ్బే మెసేజ్‌లు మా ఒంటికి పడవని పుసుక్కున తీసి పారేయకండోయ్‌. సినిమాలో విషయం ఉంటే, ఉండాల్సిన పాళ్లేమీ లేకున్నా సినిమా హిట్‌ అయ్యి తీరుతుందంతే.
ఇక 'అక్షర' సినిమా విషయానికొస్తే, విద్యతో సామాజిక మార్పు సాధ్యమనీ, అందుకోసం మన అక్షర ఏం చేసిందనే నేపథ్యంలో ఈ సినిమా తెరకెక్కింది. ఇంతవరకూ పూర్తి హీరోయిన్‌ పాత్రలో కనిపించని నందితా శ్వేతా ఈ సినిమాతో సోలో హీరోయిన్‌గా మెప్పించనుంది. గ్లామర్‌ ఉంటేనే సినిమాలకు క్రేజ్‌ వస్తున్న ఈ తరుణంలో 'అక్షర' ఎంత మేర విజయం సాధిస్తుందో చూడాలి మరి. త్వరలోనే ఈ సినిమాని ప్రేక్షకుల ముందుకు తీసుకొచ్చేందుకు సన్నాహాలు జరుగుతున్నాయి.
