టాలీవుడ్‌లో మ‌రో వివాదం రాజుకుంది. ఈసారి ఈ వివాదం టైటిల్ చుట్టూ న‌డుస్తోంది. నిఖిల్ క‌థానాయ‌కుడిగా `ముద్ర` అనే చిత్రం రూపుదిద్దుకుంటున్న సంగ‌తి తెలిసిందే. ఇదే పేరుతో నిర్మాత న‌ట్టికుమార్ జ‌గ‌ప‌తిబాబు హీరోగా ఓ సినిమాని రూపొందించారు. ఈ సినిమా ఎప్పుడో పూర్త‌య్యింది. కానీ ఈనెల 25న విడుద‌లైంది.
`ముద్ర` పేరుతో బుక్ మై షోలో టికెట్ల అమ్మ‌కం ప్రారంభించారు. ఇది నిఖిల్ న‌టించిన `ముద్ర` సినిమానే అని చాలామంది భావించి టికెట్లు కూడా బుక్ చేసుకున్నారు. విష‌యం తెలిసిన నిఖిల్ రంగంలోకి దిగి `ఆ సినిమానాది కాదు.. నా సినిమా విడుద‌ల‌కు ఇంకా టైముంది. ద‌య‌చేసి ఈ సినిమా చూడొద్దు` అని సోష‌ల్ మీడియా ద్వారా స్పందించాడు.
ఇప్పుడు ఈ ఇష్యూని న‌ట్టికుమార్ త‌న సినిమాకి ప‌బ్లిసిటీగా వాడుకుంటున్నాడు. `ముద్ర టైటిల్ నాది. ఈ సినిమా చూడొద్ద‌ని చెప్ప‌డానికి నిఖిల్ ఎవ‌రు? అస‌లు ముద్ర టైటిల్ నిఖిల్ ద‌గ్గ‌ర ఉందా? ఈ విష‌య‌మై చ‌ర్చ‌కు ఎక్క‌డ‌కు ర‌మ్మ‌న్నా వ‌స్తా. లేదంటే నిఖిల్ సినిమా ప‌రిశ్ర‌మ నుంచి వ‌దిలి వెళ్లిపోవాలి` అంటూ తీవ్ర స్థాయిలో న‌ట్టికుమార్ విరుచుకుప‌డుతున్నాడు.
జ‌గ‌ప‌తిబాబు `ముద్ర` అనే ఓ సినిమా చేస్తున్నాడ‌ని, అది విడుద‌ల అయ్యింద‌న్న సంగ‌తి కూడా ఎవ‌రికీ తెలీదు. నిఖిల్ పుణ్య‌మా అని ఆ సంగ‌తి బ‌య‌ట‌కు వ‌చ్చింది. దాన్ని న‌ట్టికుమార్ ప‌బ్లిసిటీగా వాడేసుకుంటున్నాడు. న‌ట్టికుమార్ వ్యాఖ్య‌ల‌కు నిఖిల్ ఎలా స్పందిస్తాడో చూడాలి.
