టాలీవుడ్‌లో మ‌ల్టీస్టార‌ర్ల హంగామా బాగానే న‌డుస్తోంది. టాప్ హీరోలు... చెట్టాప‌ట్టాలేసుకుని వెండి తెర‌పై సంద‌డి చేయ‌డానికి రెడీ అయిపోతున్నారు. అగ్ర హీరోల్లో వెంక‌టేష్ మ‌ల్టీస్టార‌ర్‌కి పెద్ద దిక్కు అయిపోయాడు. నాని కూడా అంతే. దేవ‌దాస్‌తో మ‌ల్టీస్టార‌ర్ వైపు రూటు మార్చాడు. వ్యూహం కూడా మ‌ల్టీస్టార‌రే. ఇప్పుడు మ‌రో మ‌ల్టీస్టార‌ర్‌కి తెర‌లేపాడు నాని. వెంక‌టేష్‌తో క‌ల‌సి న‌టించాల‌నివుందంటూ త‌న మ‌న‌సులోని మాట బ‌య‌ట‌పెట్టేశాడు.
నాని క‌థానాయ‌కుడిగా న‌టించిన చిత్రం 'జెర్సీ'. ఈ సినిమా ప్రీ రిలీజ్ ఫంక్ష‌న్‌కి వెంకీ అతిథిగా వ‌చ్చాడు. ఈ సంద‌ర్భంగా నాని త‌న మ‌న‌సులోని కోరిక బ‌య‌ట‌పెట్టాడు. ''వెంక‌టేష్ ఆవ‌కాయ్ లాంటివారు. ఆయన్ని ఇష్ట‌ప‌డ‌ని తెలుగువాళ్లు ఉండ‌రు. ఆయ‌న‌తో క‌ల‌సి ఓ మ‌ల్టీస్టార‌ర్ చేయాల‌నివుంది'' అంటూ చెప్పేశాడు. ఇలాంటి ఆఫ‌ర్లు ఎవ‌రు ఎప్పుడు ఇచ్చినా పెద్ద మ‌న‌సుతో ఓకే చేయ‌డం వెంకీకి అల‌వాటు. ఆయ‌న కూడా స‌రే అనేస్తే.. టాలీవుడ్‌లో మ‌రో మ‌ల్టీస్టార‌ర్ మొద‌లైన‌ట్టే.
