పాపం.. బాల‌కృష్ణ‌. ఈ మ‌ధ్య ఆయ‌న‌కు టైమ్ కల‌సిరావ‌డం లేదు. ఎంతో క‌ష్ట‌ప‌డి, సంక్రాంతి సెంటిమెంట్‌ని న‌మ్ముకుని విడుద‌ల చేసిన `క‌థానాయ‌కుడు` బోర్లా ప‌డింది. ఇప్పుడు `మ‌హానాయ‌కుడు` విడుదల తేదీ విష‌యంలో ఎలాంటి క్లారిటీ రావ‌డం లేదు. జ‌న‌వ‌రి 24న ఈ చిత్రాన్ని విడుద‌ల చేద్దామ‌నుకున్నారు. అది కాస్త ఫిబ్ర‌వ‌రి 6కి మారింది. ఆ త‌ర‌వాత 14కి వెళ్లింది. 21 అని కూడా అనుకున్నారు. అయితే తాజా స‌మాచారం ప్ర‌కారం... ఈనెల‌లోనూ మ‌హానాయ‌కుడు విడుద‌ల అవ్వ‌డం లేద‌ట‌.

ఈ సినిమాని ఇప్పుడు మార్చికి మార్చేశార‌ని స‌మాచారం. మార్చి 1న `మ‌హానాయ‌కుడు`ని విడుద‌ల చేయాల‌ని చిత్ర‌బృందం నిర్ణ‌యం తీసుకుంద‌ని తెలుస్తోంది. ప్ర‌స్తుతం రామోజీ ఫిల్మ్‌సిటీలో మ‌హానాయ‌కుడు షూటింగ్ జ‌రుగుతోంది. స్క్రిప్టులో కొన్ని కీల‌క‌మైన మార్పులు చేయ‌డం వ‌ల్ల చిత్రీక‌ర‌ణ ఆల‌స్య‌మైంద‌ని, అందుకే విడుద‌ల తేదీ కూడా వాయిదా వేయాల్సివ‌చ్చింద‌ని స‌మాచారం.