తన అంద చందాలతో తెలుగు ప్రేక్షకుల్ని కట్టి పడేసి, కొంత కాలం మరో హీరోయిన్‌ ఆప్షనే లేకుండా చేసింది రకుల్‌ ప్రీత్‌సింగ్‌. అయితే ఎప్పుడయితే టాలీవుడ్‌ని కాదని, బాలీవుడ్‌ వైపు చూసిందో. ఆ క్షణం నుండీ రకుల్‌ని పట్టించుకోవడం మానేశారు తెలుగు ప్రేక్షకులు. ఎంత ప్రయత్నించినా ఇప్పుడు తెలుగులో అవకాశాలు రావడం లేదు. రకుల్‌ని చూసి ఆమడ దూరం పారిపోతున్నాయ్‌ అవకాశాలు. ఎలాగోలా 'ఎన్టీఆర్‌'లో ఛాన్స్‌ దక్కించుకున్న ఈ ముద్దుగుమ్మకు దాంతోనూ చుక్కెదురైంది.
ఇదిలా ఉంటే, తమిళంలో మాత్రం ప్రస్తుతం రకుల్‌ హవా బాగానే నడుస్తోందనుకోవాలి. తమిళ తంబీలు అమ్మడి గ్లామర్‌కి తెగ ఇంప్రెస్‌ అయిపోతున్నారట. వారి అభిమానం చాలా గొప్పదని తమిళ తంబీలకు క్రీమ్‌ బిస్కెట్స్‌ వేసేస్తోంది రకుల్‌. అక్కడ వరుసగా సూర్య, కార్తి సినిమాలతో బిజీగా ఉంది రకుల్‌. త్వరలోనే కార్తితో 'దేవ్‌' సినిమాతో ప్రేక్షకుల ముందుకు రానుంది. గతంలో 'ధీరన్‌ అధిగారం ఒండ్రు' (తెలుగులో ఖాకీ) చిత్రంతో మంచి పేరు దక్కించుకుంది ఈ జంట.
మరోసారి ఇదే కాంబినేషన్‌లో రానున్న 'దేవ్‌' పైనా మంచి అంచనాలున్నాయి. ఇదో ట్రావెల్‌ లవ్‌స్టోరీ. భిన్నమైన కథాంశంతో రూపొందుతోంది. ఈ సినిమాలో మిడిల్‌ క్లాస్‌ అమ్మాయి మేఘన పాత్రలో నటిస్తోంది రకుల్‌. మరోవైపు సూర్యతో నటిస్తున్న 'ఎన్‌జీకే' చిత్రం కూడా షూటింగ్‌ దశలో ఉంది. ఇదే కాక మరో యంగ్‌ హీరో శివకార్తికేయన్‌తోనూ రకుల్‌ నటిస్తోంది. అలాగే బాలీవుడ్‌లో 'అయ్యారీ' సినిమా ఫెయిల్యూర్‌ తర్వాత మరో రెండు సినిమాల్లో ఛాన్స్‌ దక్కించుకుంది.
