ఆర్జీవీ ఏ సినిమా ప‌ట్టుకున్నా, ఏ క‌థ తీసుకున్నా వాటి చుట్టూనే సంచ‌నాలు తిరిగేస్తుంటాయి. బాల‌కృష్ణ ఎన్టీఆర్ క‌థ‌ని రెండు భాగాలుగా తీసినా రాని హైపు ఒక్క 'ల‌క్ష్మీస్ ఎన్టీఆర్‌'కి వ‌చ్చేసింది. ఈ సినిమా ఎప్పుడొస్తుందా? అంటూ స‌గ‌టు ప్రేక్ష‌కులు, సినిమా అభిమానులు, టీడీపీ కార్య‌క‌ర్త‌లు ఆస‌క్తిగా ఎదురుచూస్తున్నారు. ఆ సినిమా విడుద‌ల‌కు సిద్ద‌మ‌వుతుండ‌గా వ‌ర్మ మ‌రో బ‌యోపిక్‌పై దృష్టి పెట్టాడు.

ఈసారి రామ్‌గోపాల్‌ వర్మ కేసీఆర్ క‌థ‌ని వెండి తెర‌పై తీసుకురానున్నాడు. కేసీఆర్ బ‌యోపిక్ తీస్తాన‌ని వ‌ర్మ ఇదివ‌ర‌కే ప్ర‌క‌టించాడు. ఇప్పుడు అందుకు రంగం సిద్ద‌మ‌వుతోంద‌ట‌. ''కేసీఆర్ బ‌యోపిక్ తప్ప‌కుండా తీస్తా.. అందుకు సంబంధించి రిసెర్చ్ కూడా జ‌రుగుతోంది'' అని వ‌ర్మ స్ప‌ష్టం చేశాడు. ఇది వ‌ర‌కు కేసీఆర్ ముక్కుపై, గ్లామ‌ర్ పై ర‌క‌ర‌కాల కామెంట్లు చేసి వ‌ర్మ అంద‌రి దృష్టినీ ఆక‌ర్షించాడు. ఆ త‌ర‌వాత కేసీఆర్ ప్ర‌స్తావ‌నే తీసుకురాలేదు. ఇప్పుడు మాత్రం బ‌యోపిక్‌కి సిద్ధ‌మ‌వుతున్నాడు. త‌న క‌థ‌లో కేసీఆర్‌ని ఎలా చూపిస్తాడో మ‌రి..!