చిరంజీవి సూప‌ర్ హిట్టు చిత్రాల‌లో అభిలాష ఒక‌టి. అందులోని పాట‌ల‌న్నీ సూప‌ర్ హిట్టే. చిరంజీవి లాయ‌ర్‌గా న‌టించి, న‌వ్వులు పంచారు. ఇప్పుడు ఆ సినిమా ఎందుకు గుర్తొచ్చిందంటే - మారుతి ద‌ర్శ‌క‌త్వంలో సాయిధ‌ర‌మ్ తేజ్ క‌థానాయ‌కుడిగా ఓ చిత్రం తెర‌కెక్క‌నుంది.  ప్ర‌స్తుతం స్క్రిప్టు ప‌నులు జ‌రుగుతున్నాయి. ఈ క‌థ‌.. `అభిలాష‌` క‌థ‌కి కాస్త ద‌గ్గ‌ర‌గా ఉంటుందట‌. ఇందులో సాయిధ‌ర‌మ్ తేజ్ `చెట్టుకింద ప్లీడ‌రు` పాత్ర‌లో క‌నిపిస్తాడ‌ని, అమాయ‌క‌మైన లాయ‌రుగా న‌వ్విస్తాడ‌ని తెలుస్తోంది.

ప్ర‌స్తుతం సాయిధ‌ర‌మ్‌ `చిత్ర‌ల‌హ‌రి`లో న‌టిస్తున్నాడు. ఏప్రిల్‌ 12న ఈ సినిమా విడుద‌ల కానుంది. ఆ త‌ర‌వాతే.. మారుతి సినిమా ప‌ట్టాలెక్క‌బోతోంది. క‌థానాయిక‌గా ర‌ష్మిక పేరు ప‌రిశీలిస్తున్నారు. అన్న‌ట్టు ఈ సినిమా కోసం సాయిధ‌ర‌మ్ తేజ్ కాస్త బ‌రువు త‌గ్గాల‌ని భావిస్తున్నాడ‌ట‌. అందుకోసం క‌స‌ర‌త్తులు కూడా మొద‌లెట్టాడ‌ని టాక్‌.