యంగ్‌ హీరో నాని తాజా సినిమా కోసం 'గ్యాంగ్‌లీడర్‌' టైటిల్‌ని కన్‌ఫామ్‌ చేసిన సంగతి తెలిసిందే. ఇదిలా ఉంటే తమిళ హీరో కార్తీ తాజా చిత్రానికి 'ఖైదీ' అనే టైటిల్‌ని ఖరారు చేశారు. మరోవైపు ఇంకో యంగ్‌ హీరో 'ప్రాణం ఖరీదు' అంటూ వస్తున్నాడు. ఆల్రెడీ మెగాస్టార్‌ అల్లుడు కళ్యాణ్‌దేవ్‌ 'విజేత' టైటిల్‌తో తెరంగేట్రం చేసి విజయం దక్కించుకున్నాడు. ఇక ఇప్పుడు, రాబోతున్న ఈ చిరంజీవి టైటిల్స్‌తో యంగ్‌ హీరోలు ఎలాంటి హిట్స్‌ సొంతం చేసుకుంటారో కానీ, ఇప్పుడు ఈ టాపిక్‌ అయితే హాట్‌ టాపిక్‌ అయ్యింది.
తెలుగులోనే కాకుండా, కార్తి తాజా చిత్రంతో తమిళంలోకీ చిరంజీవి సినిమా టైటిల్స్‌ అడుగు పెట్టేశాయి. ఇదిలా ఉంటే, నాని హీరోగా తెరకెక్కుతోన్న 'గ్యాంగ్‌లీడర్‌' టైటిల్‌పై వివాదాలు తలెత్తిన సంగతి తెలిసిందే. నిర్మాత కమ్‌ హీరో మోహన్‌కృష్ణ ఈ టైటిల్‌ని తాను రిజిస్టర్‌ చేయించుకున్నాననీ, త్వరలో షూటింగ్‌ ప్లాన్‌ కూడా చేసుకున్నామనీ, చిరంజీవి పుట్టినరోజు సందర్భంగా ఆగష్టులో సినిమాని విడుదల చేద్దామనుకున్నామనీ ప్రకటించడంతో నాని 'గ్యాంగ్‌లీడర్‌' టైటిల్‌ డైలామాలో పడింది.
అయితే ఈ సినిమా నిర్మాణ సంస్థ అయిన మైత్రీ మూవీస్‌ వాళ్లు మోహన్‌కృష్ణ అండ్‌ టీమ్‌తో తెర వెనుక మంతనాలు చేస్తున్నారనీ సమాచారమ్‌. మొత్తానికి ఈ టైటిల్‌ నానికి దక్కుతుందో లేదో వేచి చూడాలి మరి. విక్రమ్‌ కుమార్‌ ఈ సినిమాకి దర్శకత్వం వహిస్తున్న సంగతి తెలిసిందే.
