త‌న కెరీర్ ప‌ట్ల ఇది వ‌ర‌కెప్పుడూ లేనంత జాగ్ర‌త్త ప‌డుతున్నాడు మహేష్ బాబు. ఓ సినిమా సెట్స్‌పై ఉండ‌గానే మ‌రో సినిమా గురించి ఆలోచించి, క‌థ ఫైన‌ల్ చేసుకుని రెడీగా ఉంటున్నాడు. ప్ర‌స్తుతం మ‌హ‌ర్షి సినిమాతో బిజీగా ఉన్నాడు మహేష్. ఆ వెంట‌నే సుకుమార్ తో ఓ సినిమా ప‌ట్టాలెక్కించాల‌న్న‌ది మహేష్ ప్లాన్‌. మ‌హ‌ర్షి ఏప్రిల్‌లో విడుద‌ల అవుతుంది.
మే - జూన్‌ల‌లో సుకుమార్ సినిమా మొద‌లెట్టాలి. కాక‌పోతే... ఇప్పుడు సుకుమార్ సినిమా సందిగ్థంలో ప‌డింది. సుకుమార్ ఇప్ప‌టి వ‌ర‌కూ క‌థ‌ని సిద్ధం చేయ‌లేద‌ట. ఒక‌ట్రెండు లైన్లు చెప్పాడు గానీ, స్క్రిప్టు ప‌నులు మొద‌లెట్ట‌లేద‌ని, అదెప్పుడు పూర్త‌వుతుందో తెలీక మహేష్ క‌న్‌ఫ్యూజ్ అవుతున్నాడ‌ని టాక్‌. సుకుమార్ క‌థ‌ని సిద్ధం చేసుకోవ‌డానికి చాలా స‌మ‌యం తీసుకుంటాడు.
సుకుమార్ స్క్రిప్టు ప‌నులు ఇప్పుడు మొద‌లెట్టినా, మే - జూన్‌ల‌లో పూర్తి చేయ‌డం క‌ష్టం. పూరి స్క్రిప్టు పూర్త‌యితే త‌ప్ప మహేష్ ఏ సినిమానీ ఒప్పుకోలేడు. అందుకే... `మ‌హ‌ర్షి` త‌ర‌వాత ఏం చేయాలో మ‌హేష్‌కి పాలు పోవ‌డం లేద‌ట. సుకుమార్ సినిమానే న‌మ్ముకోవాలా? లేదంటే ఈలోగా మరిన్ని క‌థ‌లు వినాలా? అనేది తేల్చుకోలేక‌పోతున్నాడ‌ని స‌మాచారం. మ‌రి మ‌హ‌ర్షి త‌ర‌వాత మహేష్ ఏం చేస్తాడో చూడాలి.
