సంక్రాంతి సీజన్‌లో డబుల్‌ ధమాకాగా విడుదలైన వెంకీ, వరుణ్‌తేజ్‌ మల్టీ స్టారర్‌ 'ఎఫ్‌ 2' హిట్‌ టాక్‌ తెచ్చుకుంది. విడుదలకు ముందు ఓ మోస్తరు అంచనాలు మాత్రమే ఈ సినిమాపై ఉన్నాయి. అలాంటిది విడుదలైన ఫస్ట్‌ షోకే సూపర్‌ గుడ్‌ టాక్‌ తెచ్చేసుకుంది. అంతకు ముందే భారీ అంచనాలతో విడుదలైన 'ఎన్టీఆర్‌ కథానాయకుడు' ఫర్వాలేదనిపించినా, రామ్‌చరణ్‌ 'వినయ విధేయ రామ' డిజాస్టర్‌ టాక్‌ తెచ్చుకోవడంతో, 'ఎఫ్‌ 2'పై ఆ ఉన్న ఓ మోస్తరు అంచనాల పైనా అనుమానపు నీడలు అలుముకున్నాయి. 

అయితే అనూహ్యంగా 'ఎఫ్‌ 2' మంచి విజయం అందుకుంది. ఇంకేముంది.. సంక్రాంతికి ప్రేక్షకుల్లో కొత్త ఉత్సాహం నెలకొంది. అంతేకాక 'ఎఫ్‌ 2' పక్కా ఫ్యామిలీ ఎంటర్‌టైనర్‌ కావడంతో టాక్‌ మంచిగా రావడంతో, 'ఎఫ్‌ 2' ప్రదర్శితమైన ధియేటర్స్‌ వద్ద సందడి వాతావరణం నెలకొంది. కొందరు సినీ ప్రముఖులు కూడా ఈ సినిమాపై ప్రశంసలు కుమ్మరిస్తున్నారు. 

అందులో భాగంగానే సూపర్‌స్టార్‌ మహేష్‌బాబు తాజాగా ఈ సినిమాని వీక్షించారు. సినిమా చాలా బాగుంది. కడుపుబ్బా నవ్వుకున్నాను..వెంకీ సార్‌ నటన అద్భుతం. వరుణ్‌ కూడా వెంకీని బానే మ్యాచ్‌ చేశాడు అంటూ ట్వీట్‌ చేశారు. గతంలో వెంకీ, మహేష్‌ నటించిన 'సీతమ్మ వాకిట్లో సిరిమల్లెచెట్టు' సినిమా మంచి విజయం అందుకున్న సంగతి తెలిసిందే. ఈ రెండు సినిమాలూ దిల్‌ రాజు బ్యానర్‌లోనే రూపొందడం విశేషం.