గతేడాది చివర్లో లాంఛనంగా ప్రారంభమైన భారీ మల్టీ స్టారర్‌ 'ఆర్‌ఆర్‌ఆర్‌' తొలి షెడ్యూట్‌ కంప్లీట్‌ అయిన సంగతి తెలిసిందే. ఇక రెండో షెడ్యూల్‌ కోసం ఫ్రెష్‌గా ముస్తాబవుతోంది. రామ్‌చరణ్‌ 'వివిఆర్‌' కోసం కాస్త గ్యాప్‌ తీసుకున్నాడు. రాజమౌళి కొడుకు పెళ్లి నిమిత్తం ఇంకాస్త గ్యాప్‌ తీసుకున్నాడు. టోటల్‌గా ప్రస్తుతం టీమ్‌ అంతా ఆయా పనుల నుండి ఫ్రీ అయిపోయింది. దాంతో సెకండ్‌ షెడ్యూల్‌కి రంగం సిద్ధం చేస్తున్నారు.
హైద్రాబాద్‌ శివార్లలో ఈ షెడ్యూల్‌ కోసం ఓ భారీ సెట్‌ని ఏర్పాటు చేస్తున్నారట. ఈ సెట్‌లో ఇద్దరు హీరోలు రామ్‌చరణ్‌, ఎన్టీఆర్‌లతో కీలక సన్నివేశాలు చిత్రీకరణ జరగనుందట. ఈ షెడ్యూల్‌ని ఈ నెల 21 నుండే స్టార్ట్‌ చేయనున్నట్లు తెలుస్తోంది. ఈలోగా ఈ సినిమా కోసం హీరోయిన్ల ఎంపికలో దాదాపు ఓ క్లారిటీకి రానున్నారట జక్కన్న అండ్‌ టీమ్‌. ఈ సినిమాలో కీర్తి సురేష్‌, రకుల్‌ ఇలా పలువురు ముద్దుగుమ్మల పేర్లు పరిశీలనలో ఉన్నాయి.
అలాగే కొందరు బాలీవుడ్‌ భామల పేర్లు కూడా ఈ లిస్టులో ఉన్నట్లు విశ్వసనీయ వర్గాల సమాచారమ్‌. రాజమౌళి తండ్రి విజయేంద్రప్రసాద్‌ ఈ సినిమాకి కథనందించిన సంగతి తెలిసిందే. రాజమౌళి తన సినిమాలకు సంబంధించి కథలు ముందే రివీల్‌ చేస్తుంటాడు. కానీ ఆర్‌ఆర్‌ఆర్‌ విషయంలో కథను గోప్యంగా ఉంచడం విశేషం. దాంతో ఈ సినిమా స్టోరీ ఇలా ఉండబోతోంది, అలా ఉండబోతోంది అంటూ అన్‌లిమిటెడ్‌ గాసిప్స్‌ ఇంకా చక్కర్లు కొడుతూనే ఉన్నాయి.
