గుండెజారి గ‌ల్లంత‌య్యిందే... సినిమాతో నితిన్‌కి ఓ సూప‌ర్ హిట్ ఇచ్చాడు కొండా విజ‌య్ కుమార్‌. ఆ హిట్టుతో కొండాకి బోలెడ‌న్ని అవ‌కాశాలు వ‌చ్చాయి. ఆత‌ర‌వాత నాగ‌చైత‌న్య‌తో `ఒక లైలా కోసం` తీశాడు. ఆ సినిమా ఫ్లాప్ అవ్వ‌డంతో అడ్వాన్సుల‌న్నీ వెనక్కి వెళ్లిపోయాయి. అప్ప‌టి నుంచి కొండా ర‌క‌ర‌కాల ప్ర‌య‌త్నాలు చేశాడు. నితిన్ కోసం ఓ క‌థ త‌యారు చేసి, అతని చుట్టూ తిరుగుతూనే ఉన్నాడు. ఆల్రెడీ ఉన్న క‌మిట్‌మెంట్స్ వ‌ల్ల కొండాకు మ‌రో చాన్స్ ఇవ్వ‌లేక‌పోయాడు నితిన్.
అయితే ఎట్ట‌కేల‌కు యంగ్ హీరో నితిన్ క‌రుణించాడు. కొండా విజ‌య్ కుమార్‌తో సినిమా చేయ‌డానికి రెడీ అయ్యాడు. ఇది కూడా నితిన్ సొంత నిర్మాణ సంస్థ శ్రేష్ట్ మూవీస్‌లో తెర‌కెక్క‌బోతోంద‌ని స‌మాచారం. గుండెజారి గ‌ల్లంత‌య్యిందేలో ఓ విభిన్న ప్రేమ‌క‌థ‌ని చూపించాడు కొండా. ఈసారీ అలాంటి ప్ర‌య‌త్నమే చేస్తున్నాడ‌ట. అతి త్వ‌ర‌లో ఈ సినిమా సెట్స్‌పైకి వెళ్ల‌బోతోంది. ఈ లోగా పూర్తి వివ‌రాలు చిత్ర‌బృందం స్వ‌యంగా వెల్ల‌డించే అవ‌కాశాలున్నాయి.
