చైల్డ్‌ ఆర్టిస్ట్‌గా తెలుగు తెరకు పరిచయమైన కుర్రాడు విక్రమ్‌ సహిదేవ్‌. హీరోగా 'ఎవడు తక్కువ కాదు' సినిమాతో రాబోతున్నాడు. రఘు జయ దర్శకత్వం వహించారు ఈ సినిమాకి. కన్నడలో మంచి విజయం సాధించిన 'గోలీసోడా' సినిమాని తెలుగులో 'ఎవడు తక్కువ కాదు' టైటిల్‌తో విడుదల చేస్తున్నారు. నిజానికి ఇది తమిళ సినిమాకి కన్నడ రీమేక్‌. ఆ కన్నడ మూవీని తెలుగులో డబ్‌ చేస్తున్నారిప్పుడు. ఇకపోతే హీరోగా నటించిన విక్రమ్‌ సహిదేవ్‌ గురించి మాట్లాడుకోవాలి. ఇప్పుడీ యంగ్‌స్టర్‌ టాలీవుడ్‌ని బాగా ఆకర్షిస్తున్నాడు.
తాజాగా ఈ సినిమా ప్రివ్యూని ప్రదర్శించారు. అతి కొద్ది మంది సినీ ప్రముఖుల కోసం ప్రదర్శించిన ఈ ప్రివ్యూ చూసినవారు విక్రమ్‌ సహిదేవ్‌పై ప్రశంసల జల్లు కురిపిస్తున్నారు. నటుడిగా విక్రమ్‌కి మంచి భవిష్యత్తు ఉందని అంటున్నారు. నిజానికి ఈ విక్రమ్‌ సహిదేవ్‌ ఎవరో తెలుసా.? ఈ మధ్య అల్లు అర్జున్‌ నటించిన 'నా పేరు సూర్య నా ఇల్లు ఇండియా' సినిమాలో అన్వర్‌ పాత్రలో యంగ్‌ లుక్స్‌తో ఆకట్టుకున్న కుర్రోడే ఈ విక్రమ్‌. కొద్ది సమయమే కనిపించినా ఆ సినిమాలో విక్రమ్‌ నటనకు మంచి మార్కులు పడ్డాయి.
గతంలో 'రుద్రమదేవి' తదితర సినిమాల్లో చైల్డ్‌ ఆర్టిస్ట్‌గా కనిపించాడు. చైల్డ్‌ ఆర్టిస్ట్‌గా కెరీర్‌ స్టార్ట్‌ చేసి, స్టార్‌ హీరోలుగా పేరు తెచ్చుకున్న వారు చాలా మందే ఉన్నారు టాలీవుడ్‌లో. ముఖ్యంగా మహేష్‌బాబు పేరు ఆ వరుసలో ముందుంటుంది. అలాగే అన్వర్‌కి కూడా మంచి భవిష్యత్తుందంటున్నాయి టాలీవుడ్‌ వర్గాలు. త్వరలో ప్రేక్షకుల ముందుకు రానున్న 'ఎవడు తక్కువ కాదు' సినిమాతో హీరోగా విక్రమ్‌ ఆడియన్స్‌ నుండి ఎలాంటి రెస్పాన్స్‌ అందుకుంటాడో చూడాలిక.
