నాగార్జున కెరీర్‌లో 'మన్మధుడు' ఓ సూపర్‌ డూపర్‌ హిట్‌ మూవీ. ఆ సినిమాకి సీక్వెల్‌ రూపొందించాలని చాన్నాళ్లుగా సన్నాహాలు జరుగుతున్నాయి. తాజాగా ఈ ప్రాజెక్ట్‌పై ఓ క్లారిటీకి వచ్చినట్లుగా తెలుస్తోంది. 'చిలసౌ' సినిమాతో దర్శకుడుగా పరిచయమైన యంగ్‌ హీరో రాహుల్‌ రవీంద్రన్‌ ఈ సినిమాకి దర్శకత్వం వహిస్తున్నాడు. కాగా ఈ సినిమాని త్వరలో లాంఛనంగా ప్రారంభించేందుకు ఘనంగా ఏర్పాట్లు జరుగుతున్నాయట.
వర్మతో 'ఆఫీసర్‌' సినిమా తర్వాత నాగార్జున తెలుగులో మరో సినిమా చేయలేదు. కానీ బాలీవుడ్‌లో బిగ్‌ ప్రాజెక్ట్‌ 'బ్రహ్మాస్త్ర'లో నటించాడు. తర్వాత తమిళంలో ధనుష్‌ రూపొందిస్తున్న భారీ బడ్జెట్ మూవీలోనూ కీలక పాత్రలో నటించాడు. ఇప్పుడే మళ్లీ టాలీవుడ్‌ సినిమాపై దృష్టి పెట్టాడు. 'సోగ్గాడే చిన్నినాయనా' ఈ మధ్య కాలంలో నాగార్జునకు కెరీర్‌ బెస్ట్‌ హిట్‌ ఇచ్చింది. ఆ తరహాలోనే 'మన్మధుడు 2' కూడా ఉండబోతోందనీ అంటున్నారు.
'మన్మధుడు' సినిమాకి త్రివిక్రమ్‌ మాటలు అన్ని వర్గాల వారిని ఎంజాయ్‌ చేసేలా చేశాయి. విజయ్‌ భాస్కర్‌ దర్శకత్వం వహించాడు. కాగా ఇప్పుడు యంగ్‌హీరో రాహుల్‌ రవీంద్రన్‌ ఆ ప్రాజెక్ట్‌ని ఎలా డీల్‌ చేస్తాడో కానీ, అంతకు మించి అనే రేంజ్‌లోనే 'మన్మధుడు 2' ఉండబోతోందనీ తెలుస్తోంది. రాహుల్‌ రవీంద్రన్‌ స్క్రిప్టుపై బాగా హార్డ్‌ వర్క్‌ చేస్తున్నాడట. మార్చిలో ఈ సినిమాని లాంఛ్‌ చేసే అవకాశాలున్నట్లు తెలుస్తోంది. అన్నట్లు ఈ సినిమా కోసం హీరోయిన్‌గా పాయల్‌ రాజ్‌పుత్‌ని పరిశీలిస్తున్నారు.
